01 De sa grand’amye
Dedans Paris, ville jolie,
Un jour, passant mélancolie,
Je prins alliance nouvelle
A la plus gaye demoyselle
Qui soit d’icy en Italie.
D’honnesteté elle est saisie,
Et croy, selon ma fantasie,
Qu’il n’en est guères de plus belle
Dedans Paris.
Je ne la vous nommeray mye,
Sinon que c’est ma grand’amye ;
Car l’alliance se feit telle
Par un doulx baiser que j’eus d’elle,
Sans penser aucune infamie,
Dedans Paris.
02 D’Anne qui luy jecta de la neige
Anne par jeu me jecta de la neige,
Que je cuidoys froide, certainement :
Mais c’estoit feu, l’expérience en ay-je,
Car embrasé je fus soudainement.
Puisque le feu loge secrètement
Dedans la neige, où trouveray-je place
Pour n’ardre point ? Anne, ta seule grace
Estaindre peut le feu que je sens bien,
Non point par eau, par neige ne par glace,
Mais par sentir un feu pareil au mien.